Rev 18 | DOB | STEP | Ta wate 'ebweu anilose ya'itena galewega 'imwa'umwa'utama, tauna ma ina loina sinabwana, ta wate 'ina maedanega bale'u maibo'ana 'ituyayalina,

Revelation of John 18

'Asa Babiloni 'ina be'u

1 Ta wate 'ebweu anilose ya'itena galewega 'imwa'umwa'utama, tauna ma ina loina sinabwana, ta wate 'ina maedanega bale'u maibo'ana 'ituyayalina, 2 ga 'enana sinabwanega 'ibwau, “'Asa sinabwana nina Babiloni ni'atu 'ibe'u saba, ga tonitonibwa'a ta yaluyaluwa bi'iyao ta wate manuwa to'umalidi be gadiluludi sie'asaena. 3 Manuna Babiloni 'ina oinega boda yauyaudi 'ienumedi, oine nina nate loelata to'umalina. Tauna 'atuwa tosogala. 'Enega bale'u 'ana kiniyao ma'edi siloegesi, ta 'ina loegesi nidi 'ediyega toeusanao 'idi esaesa sinabwana silobaloba.”

4 'Enega galewega wate 'ebweu 'enana yanonona, 'igwae, “'Igu tomotaiyao 'asa nate solanega waapwesama, 'abona nai 'ina to'umalina 'emiya 'iabala be 'ana e'isa to'umalina waloba. 5 Manuna 'ina to'umalina 'ana sinabwa 'atuwa nadigega galewa 'ina tu'e, ta 'ina bubuna to'umalidi nidi getedi manudi Yaubada 'inuwanuwa be 'aene 'ida e'isa.”

6 Ta wate anilose nina 'igwae, “'Asa gote 'uda e'isa, nadigega tuga to'ase 'ina guinuwa, be 'uda e'isa maluwa. Be wate tauna 'ina oine to'umalina maluwa 'u'ebwa'e, be tauna 'inuma. 7 Ta wate 'ina ona gagasa be 'ina sogala 'adi e'isa 'uda 'ebwa'e, uya be dedoi, manuna taunamo 'ena 'igwae, ‘'Abo'agu kuwini, nigeya wate kwabula 'ina sena 'ena yamiyami, ta wate geya'abo dedoi yalobaloba.’ 8 'Enega 'asiyata 'ebweu 'ena mwau nidi getedi 'enaya sida apwesa, nate le'oasa be dedoi be botana, be wate kaiwe sabelulu 'ida 'alasi. Manuna 'Inapwana tauna Yaubada Toewaiwai sana waine nina 'ana e'isa 'ida 'ebwa'e.”

9 Ta bale'u 'ana kiniyao, taudi waine nina ma'ediya siloyaweya ga simiya sogalaya, taudi wate 'asa nina manuna sidoonaona, be sidedo 'abo 'asa 'i'ala'alasi, ta 'asuna si'ita. 10 Ta ma idi matauta 'ina 'elouya manuna, 'enega 'edasolaya sitoolo ta sigwae, “Oioi, oioi, 'asa sinabwana ta waiwaina Babiloni ni'atu 'ana loina 'iloba maninina.”

11 Ta wate bale'uya toeusanao ma idi nuwamwau ga 'asa nina manuna sidedoi, manuna nigeya sa'i 'ebweu wate yaita be 'idi gwegwe nidi 'ida gimwanedi. 12 'Idi gwegwe nidi nate nadigega goula, be siliba, be gulewa esaesa, be paku, be 'oama wakewakekedi, be 'oama esaesa yomwayomwalidi, be kaiwe maimaidi, be dona sinabwadi, be kaiwe bobo'adi nadigega gai, be kopa kainumu, be gulewa wakewakekedi, 13 be 'ane, be mwadi, be gala'u, be bunama, be gweda bobo'adi, be oine, be bunama olibe, be witi, be bulumakau, be sipi, be osi, be wagalisilisi, ta wate tomota mayawasidi be mayaluyaluwadi sida egimwaneyedi be 'aene 'idi topaisewao.

14 'Enega toeusanao nidi sida ona 'asa nina 'enaya be sida gwae, “Yage nidi bobo'adi nuwanuwayo ni'atu sisawala, ta wate 'imu esaesa be 'amu tupu maibo'ana 'igumwala, ta geya'abo wate 'ulobaloba limadi.”

15 Ta toeusanao, taudi 'idi esaesa sinabwadi 'asa nina 'enega silobenaya, sida toolo 'edasolaya, manuna 'asa nina 'ina 'elouya si'itena ga simatauta, ga ma idi 'ateuyauya sidedoi, 16 sigwae, “Oioi, oioi, 'asa gote sinabwana lowa 'ieiyala kaleko esaesa, be 'oama wakewakekedi be bweyabweyalidi, be goula, be gulewa esaesa, be paku 'ediyega, 17 ga tuta gidalina namo 'ena ga 'ina esaesa nidi ni'atu sisawala.”

Ta wate taudi toniwaga, be 'idi to'adau maibo'adi, be bwagabwaga 'ana topaisewao yauyaudi, 'edasolega sida toolo, 18 ta 'asa nina 'asuna sida 'ita be sida bwau, “Lowa nigeya 'ebweu 'asa 'ana 'ita nadigega 'asa gete sinabwana, ta gete tuga mwa'adega?”

19 'Enega taudi debadi sida kwausidi be sidedoi sinabwana, sigwae, “Oioi, oioi, 'asa gote sinabwana 'enega to'adauyao 'idi esaesa silobediya, ta tuta kukupana namo 'enaya esaesa maibo'ana ni'atu 'isawala.

20 “Wada gwausowala galewaya 'omi Yaubada 'ina tomotaiyao, be wate palopitao, be 'ana tosimanao ma'emiyao wada gwausowala, manuna lowa 'imi 'elouya 'asa nina 'enega walobena, ta gete tuga Yaubada sa'i 'elouya 'enega 'ie'isedi.”

21 'Enega 'ebweu anilose toewaiwai gulewa sinabwa wawasae 'igilagasina ga olaya 'iula mwa'utena, 'igwae, “'Asa nina sinabwana Babiloni 'ibebe'u gulewa gete nadigega, be geya'abo wate 'itenamo.

22 “'Enega 'asa nina 'ina gwausowala 'igugumwala, be geya'abo 'ebweu wate 'ebe gwanegwane 'ana unuwa, nai yoguli 'ana mu'e, siapweapwesa.

“Ta wate paisewa 'adi tosinapuyao geya'abo wate simiyami, ta wate sabutu 'ana nono 'igugumwala 'enaya.

23 “'Enega mayale 'idi maedana 'enaya geya'abo siapweapwesa. Ta wate geya'abo toaiyao 'enadi 'asa nina 'enega sinoono.

“Ona'ai'aila, bale'u maibo'ana 'enega 'asa nina 'ana toesaesao siloetana wawasae, ga 'idi nabwasuwa 'ediyega mali sena tomoteninao sikaboedi.

24 “Ta wate lowa tomota yaudi nadigega palopitao be Yaubada 'ina tomotaiyao, siloemwawasidi 'asa nina 'enaya.” 10 Et 19:2-3v20 Et 19:1-2